Me 8 shkurt, në Hotel Nartel, u bë lanismi i hulumtimit “Shkaqet thelbësore të pjesëmarrjes së ulët të grave nga minoritetet si krijuese mediale në mediat e Kosovës”, i përgatitur nga autoret Shqipe Gjocaj dhe Dafina Halili.
Gjatë këtij eventi pati panel diskutimi, ku u diskutuan gjetjet nga hulumtimi, dhe pati diskutim të frytshëm mes pjesëmarrësve dhe panelistëve, ku u ngritën shumë çështje rreth pozitës së grave nga minoritetet në mediat në Kosovë.
Shqipe Gjocaj, autore e këtij hulumtimi foli për gjetjet dhe procesin e hulumtimit. U diskutua për arsyet që gratë nga minoritetet në Kosovë kanë një pjesëmarrje të ulët si krijuese mediale në vendin tonë. Disa nga arsyet janë racizmi i institucionalizuar, diskriminimi racor dhe mungesa e mundësive të punësimit, portretizimi stereotipik në media, mungesa e gjithëpërfshirjes.
Pos autoreve pjesë e panelit të diskutimit ishte edhe Nora Xhuzi, gazetare në redaksinë e egjiptianëve, e cila ishte po ashtu pjesë e hulumtimit. Ajo foli më shumë rreth sfidave të të qenit gazetare, duke filluar nga paragjykimet rreth pamjes fizike e ngacimimeve të shumta. Pavarësisht se ligjet janë mirë të rregulluara në këtë drejtim ato në praktikë nuk gjejnë zbatim sipas Norës. Pavarësisht gjithë këtyre ajo ende i inkurajon të gjitha vajzat të ndjekin ëndrrën e tyre pavarësisht vështirësive.
Anđelka Ćup nga Radio Gračanica, foli rreth sfidave të grave serbe si krijuese mediale në Kosovë. Ajo diskutoi rreth gjuhës që përdoret në mediat në Kosovë, ajo inkurajoi të ketë unfikim dhe të respektohen të drejtat e të gjitha komuniteteve.
Ky panel diskutimi është pjesë e projektit “Forcimi i Mediave të Pavarura dhe Promovimi i Sigurisë së Gazetarëve në Kosovë”, i cili financohet nga Ministria e Punëve të Jashtme, Komonuelthit dhe Zhvillimit të Mbretërisë së Bashkuar përmes Ambasadës Britanike në Prishtinë dhe Albany Associates.
