Ministri i Mbrojtjes, Armend Mehaj, me ftesë zyrtare nga autoritetet më të larta të Universitetit të Forcave të Armatosura – Helmut Schimdt, ka udhëtuar për vizitë zyrtare në Republikën e Gjermanisë.
Gjatë kësaj vizite, ministri Mehaj do të realizojë takim me homologen gjermane, ministren e Mbrojtjes, Christine Lambrecht, takim ky i pari i një ministri të Mbrojtjes së Republikës së Kosovës në Bundeswehr.
Gjithashtu gjatë kësaj vizite, Mehaj do të realizojë edhe takimin e radhës së Grupit të Kontaktit për Mbrojtjen e Ukrainës që organizohet nën patronatin e Sekretarit të Mbrojtjes së SHBA-së, në Ramstein.
Vizita e ministrit Mehaj në Gjermani, pas vizitave të ndërsjella në nivel ministrash është me rëndësi shumë të madhe për proceset zhvillimore të vendit në përgjithësi dhe për proceset zhvillimore e integruese të Ministrisë së Mbrojtjes dhe FSK-së në veçanti, thuhet në postimin në Facebook të Ministrisë së Mbrojtjes së Kosovës.
