Ministrja e Arsimit, Arbërie Nagavci ka njoftuar se bashkë me zv.kryeministrin, Besnik Bislimi dhe ministrin e Financave, Punës dhe Transfereve, Hekuran Murati janë takuar me Avokatin e Popullit ku kanë shprehur gatishmërinë për të vazhduar dialogun dhe fillimin e procesit mësimor. Ndërkohë, kanë pranuar një letër nga Avokati i Popullit, Qelaj të cilën e kanë shqyrtuar dhe është kthyer përgjigja duke adresuar propozimet e tij.
Nagavci në postimin e saj në Facebook ka thënë se si Qeveri kanë pritur që të ketë gatishmëri edhe nga SBASHK-u dhe të vazhdojnë dialogun social e të fillojë mësimi, por, tashmë që Sindikata ka dalë me qëndrim se greva vazhdon. SBASHK-u tanimë po e dëshmon se grevën nga një instrument e ka shndërruar në objektiv në vete.
Si e tillë, greva e ka humbur çdo kuptim andaj, si ministre e Arsimit ftoj mësimdhënësit anembanë Kosovës që, nga nesër t’u kthehen shkollave.
Fatkeqësisht, Sindikata e Arsimit përveçse po refuzon bashkëpunimin me Qeverinë, ka dështuar dhe refuzuar edhe rolin ndërmjetësues të Presidentes e tash së fundi edhe të Avokatit të Popullit.
