Presidentja e Republikës së Kosovës, Vjosa Osmani ka marrë pjesë sot në ceremoninë e rreshtimit të Kuadrateve të FSK-së, me rastin e shënimit të Epopesë së UÇK-së, e cila u mbajt në Kazermën “Adem Jashari”, Prishtinë.
“Sot e përgjithmonë, nderojmë trimërinë, vendosmërinë dhe sakrificën e komandantit legjendar Adem Jashari dhe familjes Jashari, vajzave e djemve të UÇK-së dhe të gjithë atyre që sakrifikuan që ëndrra jonë shekullore për liri e për shtet të bëhet realitet”, ka shkruar presidentja Osmani.
Në këtë ceremoni, përveç presidentes Vjosa Osmani kanë marrë pjesë edhe Rifat Jashari si dhe anëtarë tjerë të familjes Jashari, kryetari i Kuvendit, Glauk Konjufca, kryeministri Albin Kurti, zëvendëskryeministra, ministra, komandanti i Forcës së Sigurisë, gjenerallejtënant Bashkim Jashari si dhe deputetë të Kuvendit të Kosovës, thuhet në faqen zyrtare të Presidentes së Kosovës.
