Seminari Ndërkombëtar i Gjuhës, Letërsisë dhe Kulturës Shqiptare përmbylli me sukses javën e parë të aktiviteteve shkencore, arsimore dhe kulturore.
Kjo ngjarje e organizuar nga Fakulteti Filologjik i Universitetit të Prishtinës, ka qenë një rrugëtim i jashtëzakonshëm nëpër sferat e dijes, gjuhës dhe letërsisë shqipe dhe kulturës shqiptare.
Fjalimi i prof. Muhamendin Kullashit shënon hapjen e pjesës shkencore të ligjëratave në seminar. Fjalët e tij shtruan skenën për një sërë leksionesh frymëzuese që u pasuan si ato të profesorit kroat Ranko Matasoviq, e studiueses franceze Oriane Girard, profesorit të historisë David Hosaflook dhe akademikut Hivzi Islami. Ndërsa bisedat e studiuesve nga Polonia, Turqia dhe Shtetet e Bashkuara u përqëndruan në identitetin, diplomacinë dhe mitologjinë gjatë sesionit të referencës, duke nxitur një shkëmbim global të ideve dhe perspektivave.
Seminari Ndërkombëtar i Gjuhës, Letërsisë dhe Kulturës Shqiptare është ngjarja më e rëndësishme shkencore dhe kulturore e albanologjisë që organizohet që nga viti 1974 nën ombrellën e Fakultetit Filologjik në kuadër të UP-së. Ky seminar shërben si një platformë kryesore për njohjen dhe rritjen ndërkombëtare të albanologjisë në skenën botërore, thuhet në postimin në Facebook të UP-së.
