Ministria e Mbrojtjes ka njoftuar se Komandanti i FSK-së, gjeneral Bekim Jashari mori pjesë në Konferencën e Shefave të Mbrojtjes së Kartës së Adriatikut – SHBA në Shkup, Maqedoni e Veriut me me ftesë të homologut nga Maqedonia e Veriut, gjenerallejtënant Vasko Gjurchinovski dhe bashkë-organizuar nga Komanda e Forcave Amerikane në Evropë (EUCOM), prirë nga Gjeneral Christopher Cavoli. Në konferencë mori pjesë edhe Gjeneralmajor Stephen Osborn, Komandant i Gardës Kombëtare të Ajovës, shtetit partner të Kosovës.
Gjatë konferencës, gjeneral Jashari iu drejtuar të pranishmëve një fjalim ku paraqiti të arriturat e FSK-së. Gjithashtu, Gjeneral Jashari foli për sulmet e ndodhura në veri të Kosovës dhe për faktin që ato janë kërcënim për stabilitetin e Kosovës dhe të rajonit. Gjenerali ritheksoi që gjëra të tilla nuk bën të përsëriten dhe shtetet të cilat i përkrahin ato duhet të marrin dënimin e merituar. Në fund Gjeneral Jashari zyrtarisht u deklaroi pjesëmarrësve që ka ardhur koha që Kosova të bëhet anëtare e plotë e Kartës së Adriatikut.
Konferenca ka vazhduar punimet ku në suazën e saj, Komandanti i FSK-së me delegacionin e tij ka realizuar takime bilateral me delegacionin amerikan prirë nga Gjeneral Christopher Cavoli, Komandant i Forcave Amerikane për Evrope (EUCOM).
Gjatë takimit Gjeneral Jashari prezantoi të arriturat e FSK-së dhe falënderoi Gjeneralin Cavolin për mbështetjen dhe partneritetin në fushën ushtarake mes dy vendeve. Po ashtu, u diskutua situata e sigurisë në vendin tonë dhe sfidat rreth saj.
Gjeneral Cavoli e përgëzoi Gjeneral Jasharin për lidershipin e tij së dhe njëherit ritheksoi që SHBA-të do të vazhdojnë ta mbështesin FSK-në në rrugën e zhvillimit të kapaciteteve ushtarake dhe atyre të mbrojtjes, thuhet në postimin në Facebook të Ministrisë së Mbrojtjes.
