Kryetari i Lëvizjes Vetëvendosje, njëherazi kandidati për kryeministër, Albin Kurti bashkë me kandidatin për deputet, Avni Dehari pritën ambasadoren e Maqedonisë së Veriut në Kosovë, Shpresa Jusufi, të shoqëruar nga sekretari i tretë, Rexhep Limani.
Ambasadorja Jusufi e uroi kryetarin Kurti për procesin dhe rezultatin zgjedhor duke i dëshiruar sukses në punën e mëtejme në formimin e institucioneve të reja të Republikës të Kosovës.
Ajo konfirmoi mbështetjen dhe gatishmërinë e Maqedonisë së Veriut për të bashkëpunuar në projekte që i kontribuojnë zhvillimit dhe progresit të dy shteteve.
Kurse Kurti e falënderoi për urimin dhe ndau bindjen që qeveria e re do të formohet shpejt. Ai foli për punësimin dhe drejtësinë si prioritetet kyçe të qeverisjes dhe për dy projektet që kanë të bëjnë me ndërlidhjen zhvillimore të dy vendeve, autostradën Shkup-Bllacë dhe korridorin Prizren-Tetovë, thuhet përmes një postimi në Facebook i Lëvizjes Vetëvendosje.
