U.d. e presidentes Vjosa Osmani në postimin e saj në Facebook për 32 vjetorin e grevës së minatorëve të Trepçës, ka thënë se kujtojmë me respekt luanët e nëntokës, rezistenca e tyre dridhi themelet e një pushteti sundues që promovonte e praktikonte diferencimin dhe pabarazinë.
Osmani tha se 32 vite më pas përveç se duhet kujtuar sakrificën, duhet edhe të punohet pandalshëm që minatorët tanë të punojnë në kushte të dinjitetshme e të vlerësohen si duhet për punën e tyre.
“Sot, në 32 vjetorin e grevës së minatorëve të Trepçës, kujtojmë me respekt luanët e nëntokës, të cilët me rezistencën e tyre arritën të krijojnë solidaritet e unitet popullor në tërë Kosovën. Kërkesat e tyre tejkaluan aspektet sindikale, duke u bërë pikë reference për rezistencë kundër regjimit dhe hegjemonisë serbe. Rezistenca e tyre dridhi themelet e një pushteti sundues që promovonte e praktikonte diferencimin dhe pabarazinë. 32 vite pas, përveç se të kujtojmë tërë këtë sakrificë, duhet të punojmë pandalshëm që minatorët tanë të punojnë në kushte të dinjtetshme e të vlerësohen si duhet për punën e tyre”.
