Kryeministri Albin Kurti sot ka përkujtuar masakrën në Rahovec ku forcat serbe më 19 korrik të vitit 1998, për disa ditë me radhë ekzekutuan, morën peng e zhdukën me dhunë shumë shqiptarë civilë në mënyrë arbitrare.
Kurti në postimin e tij në Facebook ka thënë se sot kujtojmë të rënët por edhe të gjallët e kësaj masakre, ata që na lanë dhe ata që mbijetuan për të treguar tmerrin e përjetuar,
Sot u bënë 23 vite nga ofensiva e forcave serbe në Rahovec e javës së 19 korrikut të vitit 1998. Për disa ditë me radhë u ekzekutuan, u morën peng e u zhdukën me dhunë shumë shqiptarë civilë në mënyrë arbitrare.
Ushtria, policia dhe paramilitarët serbë vazhduan tutje duke masakruar fëmijë, gra e pleq të strehuar në Teqenë e Sheh Myhedinit.
Vranë profesorë. Morën peng civilë. E në fund hapën dy gropa të mëdha ku i varrosën një pjesë të shqiptarëve të vrarë gjatë kësaj ofensive. 150 persona kanë mbetur të vrarë, edhe 10 persona janë ende të pagjetur.
Andaj sot kujtojmë të rënët por edhe të gjallët e kësaj masakre. Ata që na lanë, e ata që mbijetuan për të treguar tmerrin e përjetuar, dhe që akoma e bartin mallin e më të dashurve të tyre që më nuk janë, si dhe të atyre që nuk e dijnë se ku janë.
