Presidentja e Republikës së Kosovës, Vjosa Osmani Sadriu, ka pritur sot në takim drejtorin në Shërbimin Evropian të Veprimit të Jashtëm të BE-së, Marko Makovec.
Në takim me Makovec, presidentja Osmani ka theksuar se reformat e thella në sistemin e drejtësisë dhe sundimi i ligjit janë prioritete të Kosovës.
Sundimi i ligjit, sipas presidentes mbetet parakusht kryesor për suksesin e Republikës së Kosovës në çdo fushë përfshirë integrimin në BE.
Në këtë kontekst presidentja Osmani ka marrë mbështetjen nga zyrtari i lartë i BE-së Makovec për realizimin e procesit të vetingut në përputhje me standardet dhe praktikat evropiane.
Në takim me zyrtarin e BE-së, presidentja Osmani ka ritheksuar se Kosova tashmë ka përmbushur të gjithë kriteret dhe se BE-ja duhet ta mbajë fjalën ndaj Kosovës për liberalizimin e vizave.
Më tej, presidentja Osmani është shprehur në favor të thellimit të bashkëpunimit strategjik me BE-në në çështje politike, diplomatike dhe të sigurisë, por edhe me shtetet veç e veç, thuhet në komunikatën për media e Zyrës së Presidentes.
