Zyra e Kryeministrit ka organizuar punëtori të ndara për planfikim strategjik me kabinetet politike të katër ministrive: Ministrinë e Mjedisit, Planifikimit Hapësinor dhe Infrastrukturës, Ministrinë e Ekonomisë, Ministrinë e Industrisë, Tregtisë dhe Ndërmarrësisë dhe Ministrinë e Bujqësisë, Pylltarisë dhe Zhvillimit Rural.
Në takimet e mbajtura më 4 dhe 5 shkurt, u diskutua korniza e planifikimit dhe menaxhimit strategjik, që ndihmon për të administruar politikat dhe shërbimet publike që do të çojnë drejt realizimit të vizionit qeverisës. Ministrat, ministret dhe zëvendësministrat/et, prezantuan të arriturat dhe sfidat nga viti i kaluar, si dhe planet strategjike dhe operacionale për vitin 2022, drejt arritjes së qëllimeve dhe objektivave për këtë mandat qeverisës.
Për planifikim dhe zbatim të efektshëm të objektivave të Qeverisë së Republikës së Kosovës, si vlera kryesore u ritheksuan bashkëpunimi, komunikimi dhe bashkërendimi, e që kjo qeveri i ka përbrendësuar qysh nga dita e parë e qeverisjes.
U diskutuan edhe kornizat e monitorimit dhe raportimit, që do të mundësojnë matje të performancës dhe prezantim të rezultateve të arritura.
Gjatë javës së kaluar u organizuan punëtori me kabinetet politike të katër ministrive: Ministrinë e Arsimit, Shkencës, Teknologjisë dhe Inovacionit, Ministrinë e Shëndetësisë, Ministrinë e Mbrojtjes dhe Ministrinë e Drejtësisë.
Punëtori të këtilla do të vazhdojnë në javët e ardhme edhe me ministritë e tjera, thuhet në komunikatën për media e ZKM-së.
