Partia Socialdemokrate sot pranë zyrave të ZrrE-së kanë protestuar kundër rritjes së çmimit të energjisë elektrike.
Aktivistët e PSD kanë thënë se protesta sot pranë zyrave të ZrrE-së kishte vetëm një qëllim që vendimi përmes së cilit është bërë rritja enorme e faturave të energjisë elektrike të bëhej publik.
PSD kërkon lirimin e menjëhershëm të aktivistëve të saj, përfshirë edhe kryetarin e saj, Dardan Molliqaj.
Arrestimi i tyre përbën një veprim që kundërshton të drejtën për të protestuar dhe kërkuar që vendimet që na prekin të gjithëve të mos qëndrojnë të fshehura publiku.
Përderisa çmimin e lartë e të papërballueshëm për shumicën e qytetarëve të Kosovës na e kanë treguar menjëherë, shumë prej çështjeve dhe rrethanave që lidhen me këtë vendim qëndrojnë të panjohura, përfshirë këtu edhe vet vendimin.
Protesta jonë e sotme ishte kërkesë për transparencë. Kjo mungesë transparence po minon çdo mundësi që t’i kundërvihemi padrejtësisë sociale të tarifave të reja të energjisë. Për më tepër, mospublikimi i këtij vendimi bie ndesh edhe me legjislacionin në fuqi.
Përdorimi i dhunës së shtetit në shërbim të fshehjes së dokumenteve publike është një tregues i natyrës së pushtetit që sot është vendosur në vend.
Kjo çështje na prek të gjithëve e sidomos ata që kanë pak. Andaj edhe kundërshtimi është i drejtë, thuhet në postimin në Facebook të PSD-së.
