Presidentja e Republikës së Kosovës, Vjosa Osmani – Sadriu ka shpallur ditën e premte, datë 25 mars 2022, ditë zie në nderim të mikes së madhe të Kosovës, Madeleine Albright, ish- Sekretares Amerikane të Shtetit.
“Në shenjë respekti shtetëror, dita e premte, datë 25 mars 2022, shpallet ditë zie në Republikën e Kosovës për të kujtuar miken e madhe të Kosovës, Madeleine Albright e cila u nda nga jeta dje.
Zonja Albright e njohu dhimbjen e popullin tonë sepse edhe vet e kishte përjetuar persekutimin qysh në fëmijëri, prandaj qëndroi e vendosur kundër Millosheviqit deri në ndaljen e gjenocidit të tij në Kosovë.
E përkrahi parreshtur Kosovën deri në frymën e fundit, prandaj populli i Kosovës do ta kujtojë përjetësisht”, ka thënë presidentja Osmani.
Me vendim të presidentes Osmani, flamujt shtetëror ngrihen në gjysmështizë në të gjitha objektet shtetërore të Republikës së Kosovës, brenda dhe jashtë vendit, thuhet në faqen zyrtare të Zyrës së Presidentes.
