Presidentja e Republikës së Kosovës, Vjosa Osmani, në 23-vjetorin e Masakrës në Shtuticë, Vërbovc dhe fshatrave përreth të Drenasit, ka përkujtuar 275 fëmijë, pleq, gra e burra, të ekzekutuar mizorisht nga forcat e regjimit gjenocidal serb.
Në mbrojtje të popullsisë civile, atë ditë ranë edhe 40 ushtarë të UÇK-së, në krye me heroin Ilaz Kodra.
“Për të vrarët do të kërkojmë çdoherë drejtësi, sepse krimet e regjimit gjenocidal serb herët e vonë do të dalin para drejtësisë. Të masakruarit në Shtuticë, Vërbovc dhe fshatrat përreth do t`i kujtojmë përherë për t`ia ditë vlerën lirisë”, ka theksuar Osmani.
Në të njëjtën ditë, Presidentja ka përkujtuar në përvjetorin e vrajses edhe komandantin e UÇK-së, Ilaz Kodra.
“Ilaz Kodra ishte trimi i paepur që me stoicizmin e tij i doli në mbrojtje bashkëfshataravëve, ra heroikisht që ne ta përkujtojmë përjetësisht”, ka theksuar Presidentja Osmani.
Sipas saj, figurat si heroi Ilaz Kodra, ushtar i hershëm i lirisë dhe bashkëveprimtar i komandant Adem Jasharit janë jo vetëm strategë të lirisë sonë, por edhe frymëzues e referenca për rëndësinë e lirsë dhe shtetit tonë, thuhet në faqen zyrtare të Zyrës së Presidentes.
