Kryeministri Albin Kurti ka njoftuar se rreth 200 mijë fëmijë dhe mbi 20 mijë lehona do të jenë përfitues të shtesave. Këtë muaj bëhen një vit prej kur për herë të parë filluan skemën e shtesave për fëmijë dhe lehona.
Nga shtatori 2021 e deri më tani, nga këto dy skema kanë përfituar rreth 200 mijë fëmijë, mbi 20 mijë nëna të reja dhe dhjetëra mijëra familje të Republikës së Kosovës.
Kurti në postimin e tij në Facebook ka thënë se rishtazi kanë hapur aplikimin për fëmijët e lindur në vitin 2012, e në tetor do ta hapin edhe për fëmijët e lindur në vitin 2011, kështu, gradualisht po zgjerojnë skemën e shtesave drejt synimit për të përfshirë të gjitha gjeneratat deri në moshën 16 vjeçare.
Nuk ka kthim prapa shtatorit të vitit të kaluar. Shtesat për fëmijë dhe lehona janë dëshmi dhe do të bëhen traditë e qeverisjes së mirë.
Të angazhuar që secila familje ta ndiej dorën e shtetit, do të vazhdojmë edhe më tej me politika që në qendër kanë ngritjen e mirëqenies për qytetarët tanë.
