Ministria e Kulturës njofton se në Kino Armata, u mbajt organizimi përkujtimor për regjisoren Arzana Kraja ku u vlerësua lartë kontributi i regjisores në kinematografinë tonë, ndërsa u fol për trashëgiminë që ka lënë pas, një mori veprash artistike si autore e filmave të shkurtër, dokumentarë, realizime të shumta televizive dhe filma të metrazhit të gjatë.
Bashkëpunëtorët e saj theksuan se ikja e hershme e Arzanës, pikërisht në kohën kur ishte në kulmin e pjekurisë artistike, ishte humbje e madhe për artin kosovar.
Ministri i Kulturës, Hajrulla Çeku, në fjalën e tij hyrëse tha se puna e regjisores Kraja vlerësohet lartë. Duke folur për kontributin e saj në kinematografi, ministri theksoi se ajo ishte pjesë e kineastëve tanë të suksesshëm dhe padyshim një prej anëtarëve shumë të denjë të valës së re të regjisorëve në sukseset kombëtare dhe ndërkombëtare.
Ngjarja vazhdoi me shfaqjen e filmit të gjatë artistik të regjisores Kraja “Fusha e Mëllenjave”, që përmban në vete idealizmin e një ish të burgosuri politik, që është kthyer në vendlindje për të kuptuar të vërtetën e asaj kohe për tradhtinë që iu ishte bërë.
Në këtë ceremoni përkujtimore morën pjesë familja e regjisores, akademik, Mehmet Kraja, ish presidentja e Kosovës, Atifete Jahjaga, deputë të Kuvendit të Republikës së Kosovës, artistë dhe artdashës, thuhet në postimin në Facebook të MKRS-së.
