Qendra e Kompetencës“11 Marsi“ në Prizren për nderë të shënimit të 62 vjetorit të themelimit ka organizuar aktivitetin Ditët e Dyerve të Hapura, ku gjatë dy ditëve nxënësit kanë pasur mundësinë të shpalosin talentin e tyre në art, kulturë dhe shkencë.
Ministrja e Arsimit, Shkencës, Teknologjisë dhe Inovacionit, Arbërie Nagavci me këtë rast ka thënë se Qeveria po punon shumë që politikat e mira të implementohen suksesshëm për avancimin e AAP-së si dhe përafrimin kualifikimeve të arsimit dhe aftësimit profesional drejt nevojave të tregut të punës.
Nagavci theksoi se edukimi dhe ngritja profesionale e të rinjve do të jetë synimi ynë themelor për zhvillimin dhe të ardhmen e shtetit tonë e kjo mund të arrihet përmes bashkëpunimit të sinqertë nga të gjithë bartësit.
Qendra e Kompetencës “11 Marsi“ në Prizren është një nga 6 shkollat profesionale e cila funksionon në kuader të Agjensisë për Arsim dhe Aftësim Profesional dhe Arsimin për të Rritur.
Në këtë qendër mësimi zhvillohet ne 3 gjuhë mësimore: në gjuhën shqipe, në gjuhën boshnjake dhe në gjuhën turke, thuhet në postimin në Facebook të MAShTI-t.
