Universiteti i Prishtinës ka bërë të ditur se Fakulteti i Edukimit Fizik dhe Sportit po organizon lojëra në bulevardin “Xhorxh Bush”, në të cilat po marrin pjesë studentët dhe profesorët e UVP-së, por edhe rektori Qerimi, prorektorë e dekanë.
Në të njëjtën kohë, në kampus dhe në sheshin Xhorxh Bush, po vazhdojnë kurset e shkollës verore.
Një universitet veror ndryshe!
Kurse dje në bulevardin “Xhorxh Bush”, janë zhvilluar punëtori, të cilat mblodhën studentë nga fusha të ndryshme. “Aditivët e ushqimit: Toksikologjia dhe siguria” ishte tema e punëtorisë së parë, ekspertizë në të cilën sollën profesoreshat Sherein Saied Abdelgayed dhe Arbenita Hasani. Ndërkaq, pasdite profesoresha Vesna Karapetkovska- Hristoved dhe profesori Hamit Ismaili mbajtën ligjëratën me titull “Bioteknologjia e qumështit dhe bletarisë”.
Gjatë kësaj punëtorie, studentët nga India, Hungaria e Kosova, ilustruan edhe prodhimin e mjaltit. Atyre iu bashkua edhe rektori Qerimi, i cili i ftoi studentët të përfitojnë sa më shumë nga mësimet dhe përvojat që po ju ofron ky edicion i UVP-së.
Studentët e UVP-së, vizituan laboratorët në kuadër të Fakultetit të Bujqësisë dhe Veterinarisë, ndërkaq, gjatë gjithë ditës, Fakulteti i Shkencave Matematike Natyrore dhe Fakulteti i Bujqësisë dhe Veterinarisë prezantuan mundësitë që ofrojnë për studentët e rinj, vendorë dhe ndërkombëtar, thuhet në postimin në Facebook të UP-së.
