Kryeministri i Republikës së Kosovës, Albin Kurti, mori sot pjesë në hapjen e Lojërave parasportive “Kosova 2023”, të organizuara nga Komiteti Paralimpik i Kosovës (KPK), e që u mbajt në Akademinë e Kosovës për Sigurinë Publike në Vushtrri.
Me këtë rast, kryeministri Kurti tha se KPK-ja ka korrur suksese të pa mohueshme që e ndihmojnë sportin, i ndihmojnë personat me aftësi të kufizuara dhe e afirmojnë Kosovën në arenën ndërkombëtare.
Teksa përshëndeti të gjithë të pranishmit, kryeministri falënderoi veçanërisht mysafirët të cilët kanë ardhur nga Kroacia, Maqedonia e Veriut dhe Mali i Zi.
“Andaj le të shikojmë ndeshje në kuadër të atyre se çfarë janë planifikuar e përgatitur për sot, le të argëtohemi bashkë dhe sa më shumë le të shoqërohemi në mënyrë që ta mbështesim e ta ndihmojmë njëri tjetrin e natyrisht më së shumti të gjithë ata persona që janë me nevoja të veçanta apo me aftësi të kufizuara”, u shpreh kryeministri.
Ai uroi dhe shprehu përgëzime për punën angazhimin dhe kontributin që po e jep Komiteti Paralimpik i Kosovës.
Këtë vit, Lojërat Parasportive do të përfshijnë 13 disiplina sportive në total.
Mbështetja financiare për Komitetin Paralimpik të Kosovës është rritur për mbi 500%. Nga 15 mijë euro sa e kishte deri në vitin 2020, për vitet 2022 dhe 2023 KPK ka buxhet prej 100 mijë euro për vit.
Komiteti Paralimpik i Kosovës tashmë është bërë anëtare me të drejta të plota në Komitetin Paralimpik Evropian. Gjatë ditëve në vazhdim, përgjatë këtij muaji, pritet anëtarësimi i plotë edhe në Komitetin Paralimpik Ndërkombëtar.
Gjatë vitit të ardhshëm, në Paris 2024, Kosova do të shënojë pjesëmarrjen e parë në Lojërat Paralimpike.
Përveç mbështetjes së rregullt të planifikuar për KPK-në për vitin 2024, MKRS është duke përgatitur një mbështetje të veçantë për Komitetin Paralimpik të Kosovës për përgatitjen e këtyre sportistëve dhe për pjesëmarrje në Paris 2024, thuhet në komunikatën për media e ZKM-së.
Unë ju falënderoj shumë për ftesën sot edhe ju përgëzoj për këtë organizim dhe sukseset që po i tregoni edhe sa i përket anëtarësimit në organizata ndërkombëtare. Tash Komiteti Paralimpik padyshim që ka korrur suksese të pa mohueshme të cilët e ndihmojnë sportin, i ndihmojnë personat me aftësi të kufizuara dhe e afirmojnë shtetin e Kosovës në arenën ndërkombëtare.
Falënderoj këtu edhe zëvendëskryeministren Rexhepi, komandantin e KFOR-it Ristuccia, ambasadorin francez Gero, zëvendësministrat Daulina Osmani dhe Bardhyl Dobra por gjithashtu edhe mysafirët të cilët na kanë ardhur nga Kroacia, Maqedonia e Veriut dhe Mali i Zi. Andaj le të shikojmë ndeshje në kuadër të atyre se çfarë janë planifikuar e përgatitur për sot, le të argëtohemi bashkë dhe le të shoqërohemi sa më shumë në mënyrë që ta mbështesim e ta ndihmojmë njëri tjetrin e natyrisht më së shumti të gjithë ata persona që janë me nevoja të veçanta apo me aftësi të kufizuara.
Urime e përgëzime edhe njëherë për punën angazhimin dhe kontributin që po jepni!
