Fillimin e vitit të ri akademik në Kolegjin Publik të Biznesit në Mitrovicë, ministrja e Arsimit, Shkencës, Teknologjisë dhe Inovacionit, Arbërie Nagavci, e ka vlerësuar si moment të rëndësishëm për arsimin në Kosovë.
Në ceremoninë e fillimit të vitit akademik, ministrja ka theksuar se ky kolegj, i pari publik në vend, po i hap dyert për 258 studentë të rinj, të cilët përfaqësojnë shpresën tonë për të ardhmen.
“Ky vit shënon një hap të madh përpara, pasi Kolegji ofron 4 programe në Baçelor në fusha të veçanta dhe një program në nivelin Master, të akredituar nga agjencia EVALAG në Gjermani dhe validuar nga Agjencia për Akreditim në Kosovë. Kjo është një mundësi unike për të mësuar dhe zhvilluar veten në nivelin më të lartë të arsimit”, tha ministrja Nagavci.
Ajo tha se MAShTI ka treguar përkushtim të madh për këtë projekt, ndërsa theksoi se kjo është një dëshmi e qartë e synimit tonë të përbashkët për një arsim të lartë konkurrues për studentët tanë.
Ministrja Nagavci ndër të tjera theksoi përkushtimin për bashkëpunim të ngushtë me IBCM për ta avancuar atë duke e bërë model për diversitetin në arsimin e lartë jo vetëm në Kosovë por edhe në rajon.
Në këtë Kolegj, 32 përqind e studentëve të rinj vijnë nga komunitetet jo shumicë, duke e bërë këtë kolegj një vend të hapur dhe inkurajues për të gjitha komunitetet, thuhet në postimin në Facebook të MAShTI-t.
