Ministria e Financave, Punës dhe Transfereve në bashkëpunim me Bankën Botërore mbajtën sot ceremoninë inauguruese për lansimin e Projektit për Reformim të Asistencës Sociale të Kosovës
Në këtë ceremoni ishin prezent Ministri i Financave, Punës dhe Transfereve, Hekuran Murati, drejtori i Bankës Botërore për Kosovë, Massimiliano Paolucci, si dhe përfaqësues të shumtë të organizatave ndërkombëtare dhe shoqërisë civile.
Në fjalën e tij hapëse, Murati deklaroi se përmes Projektit për Reformim të Asistencës Sociale, Ministria e Financave, Punës dhe Transfereve synon të largojë diskriminimin brenda kategorive përfituese të asistencës sociale duke e bërë sistemin të atillë që në njërën anë lufton varfërinë ndërsa në anën tjetër nxit aktivizimin e përfituesve në tregun e punës.
Paolucci përgëzoi Ministrinë e Financave, Punës dhe Transfereve për përkushtimin në reformimin e skemës sociale duke thënë se ky projekt synon që të përfshijë të gjitha familjet që kanë nevojë për asistencë sociale në Kosovë.
Gjithashtu, Paolucci theksoi se zbatimi i këtij projekti ndonëse sfidues do të ketë një ndikim transformues në mirëqenien sociale të qytetarëve të Kosovës.
Të dyja palët shprehën përkushtimin për pilotimin dhe më pas zbatimin e plotë të këtij projekti duke shfaqur dedikimin e tyre në thellimin e bashkëpunimit të mëtutjeshëm, thuhet në komunikatën për media e MFPT-së.
