Kryetari i Prishtinës, Përparim Rama ka thënë se së bashku me Ministrinë e Kulturës po e rikthejnë Pallatinë e Rinisë në kryefjalën e kryeqytetit. Po e kthejnë në skenën më të madhe të muzikës shqipe, ku për tre netë me radhë do të zhvillohet për herë të parë Festivali i Këngës në RTK.
Rama në postimin e tij në Facebook ka thënë se e kanë pastruar në tërësi sallën e djegur të Pallatit. Ne si Kryeqytet bashkë me Pallatin e Rinisë dhe Ndërmarrjen Publike Banesore kemi ndarë 350 mijë euro investim për ta jetësuar këtë projekt të ringjalljes së ikonës së Kryeqytetit.
Këtë javë kjo hapësirë do të mbushet me njerëz si dikur, do të brohorasin për këngën e këngëtarin e preferuar, do të kënaqen me tingujt e magjishëm të muzikantëve tanë, nën organizimin e jashtëzakonshëm e me plot përkushtim të drejtorit të festivalit, Adi Krasta.
Gjithmonë të gatshëm dhe bashkëpunues për të mirën e qytetarëve tanë.
Për ngjarje të mëdha kulturore e me shumë rëndësi duhet bashkëpunimi.
