Ministria e Kulturës, Rinisë dhe Sportit ka njoftuar se romani “Komploti” i autorit Ben Blushi u prezantua në Librarinë Dukagjini në Prishtinë.
“Komploti” është botimi i parë i autorit i ndarë mes dy shtëpive botuese, njërës në Kosovë dhe tjetrës në Shqipëri, dhe ashtu tema e trajtuar gjen veten në dy dimensione, midis fiksionit dhe realitetit. Libri provokon imagjinatën mes ngjarjeve aktuale dhe zhvillimeve të tyre në dy dekadat e ardhme.
Prezantimin e romanit e udhëhoqën gazetari Lirim Mehmetaj, pedagogia Lindita Aliu Tahiri dhe sociologu, Shkodran Ramadani, teksa tema zgjoi debat për identitetin, bashkimin kombëtar, Evropën dhe gjendjen në të cilën ndodhet Kosova.
Të pranishëm në promovim ishin kryetari i Kuvendit të Kosovës, Glauk Konjufca, deputetet Mimoza Kusari, Tinka Kurti, Ganimete Musliu, Eliza Hoxha, nënkryetarja e PDK-së, Vlora Çitaku, personalitete publike, akademikë, njohës së fushës dhe adhurues të librit, thuhet në postimin në Facebook të MKRS-së.
