Në 23 vjetorin e vrasjes së Heroit Enver Maloku, kryetari i LDK-së, Lumir Abdixhiku me familjen Maloku dhe bashkëpunëtorë kanë nderuar figurën dhe veprën e madhe e publicistike të Enver Malokut.
“Sot, në 23 vjetorin e vrasjes së tij, kujtojmë e nderojmë patriotin e madh të Republikës së Kosovës, veprimtarin e madh të lëvizjes sonë për liri, pavarësi e demokraci, Enver Malokun.
Më 11 janar të vitit 1999, të vitit që Enver Maloku i kishte dhënë paraprakisht epitetin e vitit të lirisë, ai u vra para banesës së tij. Ndonëse lirinë e paraprirë s’arriti ta përjetojë, vepra dhe puna e jashtëzakonshme e tij u bë fundament i themeleve të lirisë që gjenerata të tëra e gëzojnë sot e do ta gëzojnë përgjithmonë.
Si themelues i Qendrës për Informim të Kosovës, si publicist e gazetar i shquar i kohës, Enver Maloku në gjithë terrin informativ të Kosovës, hapi një dritare informuese mbi të vërtetën e përballjes të popullit shqiptar të Kosovës. Kjo e vërtetë u bë burim informimi gjithandej nëpër botë. Nëpërmjet lajmeve e shkrimeve të tij, Enver Maloku denoncoi dhunën, masakrat, gjenocidin dhe eksodin e pushtuesit mbi popullin e Kosovës.
Enver Maloku, ka lënë gjurmë të pashlyera si një burrë i guximshëm, si një gazetar e idealist i një bote të lirë e pa censurë, e si një veprimtar i patrembur nga vdekja.
LDK, familja, bashkëveprimtarët e kohës ende vazhdojnë të kërkojnë të vërtetën e vrasjes së tij e cila mbetet peng për të gjithë. Vetëm zbardhja e rastit së paku do t’i lehtësonte dhimbjet tona.
Lavdi jetës dhe veprës së Heroit Enver Maloku!”, thuhet në postimin në Facebook të LDK-së.
