Ministria e Kulturës ka njoftuar se aktivitete të shumta kulturore dhe artistike do të zhvillohen në qytete të ndryshme të Kosovës në kuadër të Karvanit të Dissporës “Shijo Kosovën”.
Kjo ngjarje filloi në Gjilan në praninë e shumë zyrtarëve të lartë të nivelit qendror e lokal, bashkëatdhetarëve dhe qytetarëve.
Të pranishëm ishin ministri i Kulturës, Hajrulla Çeku, ministrja e Arsimit, Arbërie Nagavci, ministrja e Punëve të Jashtme, Donika Gërvalla, zëvendësministrja e MKRS, Daulina Osmani, zëvendësministrja e MASHT, Edona Maloku Bërdyna, zëvendësministrja e MPJD, Liza Gashi, kryetari i Komunës së Gjilanit, Alban Hyseni e zyrtarë të tjerë.
Ky organizim është bërë nga Ministria e Punëve të Jashtme, Ministria e Kulturës, Rinisë dhe Sportit dhe Ministria e Arsimit, Shkencës, Teknologjisë dhe Inovacionit në bashkëpunim dhe koordinim edhe me disa komuna.
Karvani i Diasporës do të vazhdojë nëpër qytete të tjera të vendit deri më 9 gusht, thuhet në postimin në Facebook të MKRS-së.
