Kryeministri i Republikës së Kosovës, Albin Kurti, priti sot në “Ballkonin e Hapur” të Qeverisë, drejtues dhe pjesëmarrës të konferencës “Liderët e Rinj Evropiano-Amerikanë” (European-American Young Leaders) të cilët ditëve të fundit kanë qëndruar në Kosovë.
Me ta, kryeministri Kurti zhvilloi një diskutim të hapur gjatë të cilit u diskutua për qeverisjen, reformat dhe arritjet e qeverisë, politikën e jashtme dhe synimet e Republikës së Kosovës për integrim në Bashkimin Evropian dhe në NATO.
Në fjalën e tij, kryeministri Kurti u uroi mirëseardhje në Kosovës. Ai tha se konferenca të tilla ngjallin dhe nxisin interesimin për vendin tonë. “Për disa prej juve lufta në Kosovë mund të ketë qenë ngjarja e parë e madhe politike që e mbani në mend. Shumë gjëra kanë ndryshuar prej atëherë”, u shpreh kryeministri Kurti.
Duke renditur arritjet e shoqërisë dhe qeverisë, ai veçoi përparimin demokratik.
“Sot Kosova nuk po bënë vetëm hapa të vegjël, por po bën hapa të mëdhenj drejt demokratizimit, veçanërisht në krahasim me vendet e regjionit. Zgjedhjet janë konkurruese, të lira dhe të drejta, ku opozita mund të fitojë. Gratë përbëjnë 34.17% të Parlamentit të Republikës së Kosovës, që është më shumë se sa mesatarja e vendeve të Bashkimit Evropian. Vitin e kaluar kemi zgjedhur Presidenten e dytë grua, dhe kemi një zëvendëskryeministre dhe tre ministra nga komuniteti jo-shqiptarë, si dhe tre ministra nga diaspora”, tha kryeministri Kurti.
Sa i përket agjendës së politikës së jashtme, kryeministri tha se ky vit është vit mjaft ambicioz duke qenë se përfshinë kërkesën për anëtarësim në Këshillin e Evropës dhe Programin e Partneritetit për Paqe të NATO-s, katër liritë e Procesit të Berlinit dhe aplikimin për statusin e vendit kandidat të Bashkimit Evropian, thuhet në komunikatën për media e ZKM-së.
