Ministri i Mbrojtjes, Armend Mehaj dhe ministri i Bujqësisë, Pylltarisë dhe Zhvillimit Rural, Faton Peci, kanë nënshkruar sot Marrëveshje Bashkëpunimi, qëllimi i së cilës është bashkëpunimi ndërmjet palëve, përmes ofrimit dhe realizmit të trajnimeve në fushën e sigurisë rreth ushqimit.
Bazuar në Marrëveshjen në fjalë, Agjencia e Ushqimit dhe Veterinës (AUV), merr përsipër që të përkrahë trajnimin e personelit të Ministrisë së Mbrojtjes dhe FSK-së, në fushat e caktuara dhe brenda kapaciteteve të AUV.
Në kuadër të këtyre fushave të trajnimeve, ndër të tjera përfshihen trajnimet për fushën e inspektimit në aspektin e sigurisë ushqimore, higjienës së objekteve të punës dhe mjeteve të transportit, inspektimi i higjienës së ushqimit, personelit, i ambientit që rrethon objektin, etj.
Gjithashtu, AUV do të ofrojë përkrahje në edukimin e stafit profesional ku Departamenti Mjekësor në Ministrinë e Mbrojtjes ka interes për ngritjen e shkathtësive për fushat e përcaktuara sipas marrëveshjes, thuhet në postimin në Facebook të Ministrisë së Mbrojtjes.
