Komuna e Prishtinës, ka njoftuar se sot u nënshkruan marrëveshjet e bashkëpunimit në mes kryetarit Përparim Rama dhe kryetarit të Komunës së Obiliqit, Xhafer Gashi, për realizimin e projektit të Ngrohjes Diellore “Solar4Kosovo”.
Qëllimi i kësaj marrëveshjeje në mes palëve nënshkruese është sigurimi i lokacionit për projektin e Ngrohjes Diellore “Solar4Kosovo”, në fshatin Shkabaj (Hadë e Re), e cila sipas ekspertëve të fushës eshtë përcaktuar si vend ideal për realizimin e këtij projekti.
Në pajtim me dispozitat e Ligjit për Bashkëpunim Ndërkomunal, këto marrëveshje do t’u dërgohen për shqyrtim dhe miratim, Kuvendeve Komunale të Komunave respektive.
Me këtë rast, kryetari Rama tha se realizimi i këtij projekti strategjik është i një rëndesie të veçantë për qytetarët e Kryeqytetit dhe për Komunën e Obiliqit, thuhet në komunikatën për media e Komunës së Prishtinës.
