Kryeministri i Kosovës, Abdullah Hoti ka uruar besimtarët katolikë për festën e Krishtlindjes duke thënë se kjo ditë simbolizon paqen mes Zotit dhe njerëzimit.
Historia ka përcaktuar që ne të kemi besime të ndryshme, por kjo asnjëherë nuk na ka penguar që ta duam njëri-tjetrin, që t’i kremtojmë bashkë të gjitha festat tona, ka thënë ai.
“Në kohët më të vona, kombi ynë i dha gjithë njerëzimit një model të dashurisë, mëshirës dhe urtësisë, Shën Nënë Terezën. Edhe Presidenti Rugova, i pati përzemër marrëdhëniet me Selinë Shenjtë, miqësia e tij me Papa Gjon Palin II mbetet udhërrëfyes në marrëdhëniet tona me Vatikanin.
Duke ju shprehur urimet më të mira të gjithë juve, vëllezër dhe motra të besimit katolik, uroj që kjo festë ta forcojë dashurinë mes nesh dhe popujve anekënd globit”, ka thënë kryeministri Hoti
