Kryetari i Prishtinës, Përparim Rama së bashku me Komisionin Komunal të Aksionarëve dhe me Bordin, kanë vizituar Ndërmarrjen Publike të Kryeqytetit Kuzhina Qendrore Sh.A për t’u njoftuar nga afër me zhvillimet, kualitetin, sigurinë e ushqimit si dhe me investimet e bëra nga Kryeqyteti në këtë Ndërmarrje.
Rama në postimin e tij në Facebook ka thënë se nga Asdren Osaj, kryeshef ekzekutiv i Kuzhinës Qendrore, është informuar se këtë vit ndërmarrja ka shënuar rritje prej 23% të të hyravve, pas zgjerimit në veprimtari dhe punës cilësore që kanë bërë gjatë 2023-ës. Ndërmarrja aktualisht përgatitë rreth 2.800 shujta për fëmijët e Institucioneve Parashkollore, 300 shujta për raste sociale si dhe ka filluar të përgatitë ushqim edhe për sektorin privat, sipas kërkesave.
“Diskutuam për zgjerimin e kapaciteteve me qëllim që Ndërmarrje të jetë e gatshme për sigurimin e ushqimit edhe për nxënësit e shkollave fillore, në momentin e fillimit të mësimit tërë ditorë në shkollat e Kryeqytetit”, tha kryetari Rama.
