Kryeministri Albin Kurti para se të mbahet seanca në Kuvendin e Kosovës për zgjedhjen e presidentit ka deklaruar se me zgjedhjen e presidentes përmbyllet hapi i tretë i konstituimit të institucioneve të legjislaturës së tetë.
Kurti në postimin e tij në Facebook ka thënë se mbrëmë në Kuvend ka fituar opozita kurse sonte do të fitojë shteti me zgjedhjen e presidentes së Kosovës.
Mbrëmë fitoi opozita, sonte duhet të fitojë shteti. Zgjedhja e Presidentes së Republikës është fitore për Kosovën. Ajo nuk është kundër askujt dhe është për të gjithë.
Me zgjedhjen e Presidentes përmbyllet hapi i tretë i konstituimit të institucioneve të legjislaturës së tetë.
Pas fitores me 50,28% të votave në zgjedhjet e 14 shkurtit, ne jemi shumica në Kuvendin e Kosovës.
Mbrëmë deputetët tanë ishin shumica, por nuk ishin 2/3 e të pranishmëve. Nuk arritëm të procedojmë me projektligjin që ua mundëson mërgatës të votojë në ambasadat e konsullatat tona.
Ky Projektligj nuk kishte të bënte me reformën zgjedhore. Sidoqoftë, ai sot nuk është aktual.
Sot kemi seancën për zgjedhjen Presidente të znj. Vjosa Osmani. Menjëherë pas kësaj formojmë komisionin ku bashkë me opozitën punojmë, pajtohemi dhe sivjet e përmbyllim reformën zgjedhore.
