Kryeministri i Kosovës, Albin Kurti pas vendimit të djeshëm të Qeverisë për rritjen e pensioneve ka thënë se janë larg mirëqenies, por duan që me rritjen aktuale ekonomike të ndihmojnë shtresat sociale që kanë më së shumti nevojë.
Kurti në postimin në Facebook ka deklaruar se këtë vit planifikojnë të fillojn reformën e sistemit pensional, që të sigurojnë sistem të drejtë dhe pension të dinjitetshëm për secilin pensionist që ka dhënë kontribut për vendin.
Me vendimin e djeshëm të Qeverisë janë rritur pensionet ashtu që të mos kemi asnjë të tillë nën 100 euro. Kësisoj, pensioni bazik, pensioni familjar dhe ai invalidor i punës janë rritur për 11%, kurse pensioni i aftësisë së kufizuar për 33%. E dimë që jemi larg mirëqenies por duam që me rritjen aktuale ekonomike të ndihmojmë shtresat sociale që kanë më së shumti nevojë.
Këtë vit planifikojmë të fillojmë edhe reformën e sistemit pensional, që të sigurojmë sistem të drejtë dhe pension të dinjitetshëm për secilin pensionist që ka dhënë kontribut për vendin tonë.
