Presidentja e Republikës së Kosovës Vjosa Osmani, ka pritur sot në takim ish-presidentin e Republikës së Kroacisë, Stipe Mesic dhe ish-presidentin e Republikës së Shqipërisë, Bamir Topi.
Presidentja Osmani ka falënderuar ish-presidentët Mesic dhe Topi për angazhimin e tyre të vazhdueshëm personal në mbështetje të Republikës së Kosovës, si dhe për thellimin e bashkëpunimit ndërshtetëror në mes të Kosovës, Shqipërisë dhe Kroacisë.
Gjatë takimit u theksua se raportet e ngushta ndërshtetërore në mes të Kosovës, Shqipërisë dhe Kroacisë janë ndërtuar mbi themele të forta historike dhe respekt të ndërsjellë tradicional në mes të kombit shqiptar dhe atij kroat.
Në këtë takim, Presidentja Osmani ka theksuar rëndësinë e bashkëpunimit të ngushtë ndërmjet tri shteteve, përballë sfidave rajonale dhe globale dhe në funksion të stabilitetit dhe avancimit të agjendave Euro-Atlantike në Ballkanin Perëndimor.
Presidentja Osmani shprehu besimin e saj se ish-presidentët Mesic dhe Topi do vazhdojnë të jenë avokues për Republikën e Kosovës në qarqe dhe forume ndërkombëtare ku ata marrin pjesë, thuhet në komunikatën për media e Zyrës së Presidentes.
