Zëvendësministrja e Shëndetësisë, Dr. Dafina Gexha- Bunjaku ka marrë pjesë sot në inaugurimin e sallës së rentegenit dhe Mamografit në Qendrën e Mjekësisë Familje në Kamenicë.
Në emër të ministrit të Shëndetësisë, Dr. Rifat Latifi, ajo tha se është e nderuar që është sot këtu, në inaugurimin e sallës së rentgenit dhe Mamografit, një hap ky shumë i rëndësishëm në avancimin e shërbimeve diagnostike në kuadër të Mjekësisë familjare.
“Diagnostikimi i hershëm është mbijetesë, është shpëtim i jetës së qytetarëve tanë që vuajnë nga sëmundje të ndryshme. Është gjithashtu edhe mbrojtje e familjeve tona edhe nga shpenzimet e mëdha për kujdes shëndetësor. Prandaj, kjo e bën shumë të rëndësishme këtë ditë për qytetarët e Komunës së Kamenicës dhe kësaj zone, pa dallim, duke i fuqizuar kësisoj edhe përpjekjet tona për parandalimin dhe zbulimin e hershëm të kancerit të gjirit përmes mamografit mobil”, tha ajo.
Zëvendësministrja Gexha- Bunjaku, tha po ashtu se, kanceri i gjirit është një nga format më të shpeshta të kancerit tek femrat, ndërsa kryerja e mamografisë nga femrat e moshës mbi 35 vjeçare, së paku një herë në vit, ndihmon në zbulimin e hershëm të kësaj sëmundje dhe shpëtimin e jetës së grave.
Ajo falënderoj kontribuesit me këto pajisje, Ambasadën Japoneze, Fondacionin “Jahjaga” dhe kontribuesit e tjerë.. Gjithashtu, të gjithë profesionistët shëndetësor: mjekët, infermierët, por edhe stafin mbështetës për luftën e tyre në ballafaqimin me COVID-19 dhe vaksinimin kundër COVID-19.
“Ndjehuni krenar, sepse me punën tuaj keni shpëtuar shumë jetë të qytetarëve tanë”, u tha ajo profesionistëve të pranishëm.
Dr. Gexha- Bunjaku ka shpreh përkrahjen e Ministrisë së Shëndetësisë për të bashkëpunuar dhe realizuar projekte dhe punë të mira për shëndetësinë tonë, për transformimin e saj në një sistem brenda të cilit pacientët tanë do ta marrin kujdesin që u duhet, sa më shpejt, të sigurt, cilësor dhe më kosto të përballueshme, thuhet në postimin në Facebook të MSH-së.
