Në Panama, presidentja e Kosovës, Vjosa Osmani përuroi shtatoren e Shën Nënë Terezë, të punuar nga skulptori kosovar, Bashkim Beqiri në një ceremoni të organizuar bashkë me ministren e Jashtme të Panamasë, Erika Mouynes dhe me Kryepeshkopin e Panamasë, José Domingo Ulloa.
Presidentja Osmani theksoi se ndihet e lumtur që Panamaja po e monumentalizon kujtesën për Shën Nënë Terezë. Kjo është edhe një mirënjohje për punën, vlerat dhe për madhështinë e personalitetit të saj.
Ndër të tjera, presidentja Osmani u shpreh se si bashkëkombës të saj jemi shumë krenarë me shëmbëlltyrën e Shën Terezës. Po kështu, shtoi ajo, i jemi mirënjohës popullit panamez për respektin e treguar me të gjitha nderet që mund t’i ofrohen një të shenjte, thuhet në komunikatën për media e Zyrës së Presidentes.
