Presidentja e Republikës së Kosovës, Vjosa Osmani, ka pritur sot në takim të ngarkuarën me punë të Misionit të SHBA-ve në Kosovë, Alyson Grunder, me të cilën kanë biseduar për zhvillimet e fundit në vend, rajon dhe më gjerë.
Të dy bashkëbisedueset kanë diskutuar për hapat e mëtutjeshëm dhe bashkëpunimin konkret me qëllim të thellimit të raporteve në mes të dy shteteve.
Osmani e ka njoftuar Grunder për progresin e Kosovës në drejtim të përmbushjes së zotimeve në kuadër të Samitit për Demokraci, me ç’rast shprehu mirënjohje për vlerësimin pozitiv të punës së institucioneve të Kosovës nga ana e Sekretarit Blinken.
Gjithashtu, presidentja Osmani dhe Grunder diskutuan edhe për mbajtjen e Forumit për Gratë, Paqen dhe Sigurinë, i cili do të mbahet në Prishtinë, më 21-23 tetor 2022, dhe është një nga zotimet në kuadër të Samitit për Demokraci, thuhet në faqen zyrtare të Zyrës së Presidentes.
