Ministri i Mbrojtjes, Armend Mehaj ka njoftuar se janë të gatshëm që autoriteteve sllovene t’u ofrojnë gjithë ndihmën e nevojshme brenda kapaciteteve të FSK-së, duke parë gjendjen e vështirë me të cilën po përballen tash e disa ditë pas reshjeve të vazhdueshme të shiut dhe përmbytjeve në 2/3 e vendit.
Mehaj në postimin e tij në Facebook ka thënë se ekipet e Gardës Kombëtare të FSK-së të Njësisë së Kërkim-Shpëtimit janë në gatishmëri të ofrojnë kontributin e tyre në evakuimin e banorëve në zonat e prekura si dhe vënien nën kontroll të situatës.
Shpreh ngushëllime për jetët e humbura dhe solidarizim me të gjithë ata që kanë pësuar dëme nga kjo stuhi.
Shpresojmë që vendi sa më parë t’i kthehet normalitetit.
