Trupi Zgjedhor i Bashkësisë Islame të Kosovës, zgjodhi Naim ef. Tërnavën, kryetar të Bashkësisë Islame – Myfti edhe për një mandat.
Kryetari i Bashkësisë Islame të Kosovës, Myftiu Naim ef. Tërnava u zgjodh me aklamacion për mandatin e ri në krye të këtij institucionit nga Trupi Zgjedhor, i cili përbëhet nga anëtarët e Kuendit, anëtarët Kryesisë dhe udhëheqësit e institucioneve të BI-së.
Në fjalën e tij, Myftiu Tërnava falënderoi të gjithë për besimin e dhënë dhe për mbështetjen e ofruar në mandatet e kaluara, teksa tha se prioritet në mandatin e ri është edukimi, arsimimi, avancimi dhe fisnikërimi i qytetarëve tonë.
“Ndër prioritetet kryesore është edukimi, arsimimi, avancimi dhe fisnikërimi i popullatës sonë për dynja e ahiret, ngritja, zhvillimi dhe avancimi e standardizimi i institucioneve e forumeve tona, në funksion të kërkesave të kohës për të organizuar, përgatitur e mbështetur besimtarët tanë anekënd vendit”.
Myftiu Tërnava në fjalën e tij po ashtu tha se ka për synim të ngrisë profesionalisht nëpunësit e BI-së, ruajtjen e besimtarëve nga ekstremizmi, sektarizmi dhe polarizimi i fesë e besimit. Po ashtu prioritet do të jetë edhe masivizimi i mësim besimit në gjithë Kosovën, thuhet në faqen zyrtare të BIK-ut.
Myftiu Tërnava propozoi dhe më pas u miratuan nga Trupi Zgjedhor tetë anëtarët e Kryesisë:
Burhan Hashani – Prishtinë
Shkëlze Hoxha – Mitrovicë
Musli Arifaj – Pejë
Valon Myrta – Gjakovë
Orhan Bislimaj – Prizren
Sevdair Haxhiu – Feriaj
Agim Hyseni – Gjilan
Sylejman Fejzullahu – Kosovë Lindore.
