Ministri i Mbrojtjes, Ejup Maqedonci dhe Komandanti i FSK-së, gjenerallejtënat Bashkim Jashari morën pjesë në takimin e 17-të të Grupit të Kontaktit për Mbrojtjen e Ukrainës.
Me këtë rast, 54 shtetet anëtare në mesin e të cilave dhe Kosova, edhe një herë rikonfirmuan mbështetjen e pakusht për Ukrainën që po vazhdon të përballet me agresionin rus.
“Ukraina po përjeton atë që Kosova e ndjeu gjer në palcë në luftën e vitit 1999. Rusia, po njëlloj si dhe Serbia, njeh vetëm forcën. Në një gjendje të tillë kur kërcënohet paqja përtej hapësirës gjeografike të shtetit ukrainas ne qëndrojmë të gjithë së bashku”, theksoi mes tjerash ministri Maqedonci.
Maqedonci shtoi se duke përkrahur Ukrainën, të drejtën e popullit ukrainas, me ndihmën e shteteve demokratike, do të kalojë çdo vështirësi, sepse po luftojnë për familjen e tyre dhe për të ardhmen e tyre, thuhet në postimin në Facebook të Ministrisë së Mbrojtjes.
