Ministrja e Arsimit, Shkencës, Teknologjisë dhe Inovacionit, Arbërie Nagavci në vazhdën e realizimit të politikave arsimore për zgjerimin e infrastrukturës fizike për rritjen e përfshirjes së fëmijëve në edukimin e hershëm, ka vendosur gurthemelin e çerdhes në Deçan.
Ministrja Nagavci me këtë rast ka thënë se, objekti i kësaj çerdhe është i destinuar për sistemimin e 120 fëmijëve, për të cilët do të sigurohen të gjitha hapësirat e nevojshme.
Nagavci tha se ndjehet e lumtur që është ndarë buxheti për ndërtimin e çerdhes në Deçan, ndërsa falënderoi drejtuesit e Komunës së Deçanit për bashkëpunimin në sigurimin e lokacionit dhe dokumentacionit tjetër të nevojshëm për realizimin e këtij projekti.
Ministrja Nagavci po ashtu tha se, Qeveria e Republikës së Kosovës dhe Kuvendi kanë miratuar buxhet të mjaftueshëm për të ndërtuar çerdhe aty ku ka nevojë, me ç’rast ftoi edhe njëherë komunat për bashkëpunim në sigurimin e lokacioneve dhe aspektit tjetër formal teknik, në mënyrë që të krijohen hapësira të mjaftueshme për përfshirjen e fëmijëve në edukimin e hershëm, në të gjitha komunat e Republikës së Kosovës.
Ndërtimi i çerdhes në Deçan ka vlerën 708.902.53 euro dhe hapësirë të organizuar në dy kate me sipërfaqe 1552m², thuhet në postimin në Facebook të MAShTI-it.
