Në Ministrinë e Mbrojtjes u nënshkrua Direktiva për zbatimin e Politikës për Planifikim, Programim, Buxhetim dhe Ekzekutim, si një dokument strategjik thelbësor për zhvillimin e kapaciteteve institucionale të mbrojtjes në një periudhë afatgjate.
Ky dokument është hartuar pas një analize të detajuar ndërmjet Ministrisë së Mbrojtjes dhe Forcës së Sigurisë së Kosovës, mbështetur nga Ambasada Amerikane, zv. Shefja e Misionit të SHBA-së, Alyson Grunder, si dhe Këshilltari për Planifikim, Joe Duncan, si pjesë e Programit Global të Reformës së Mbrojtjes.
Dokumenti në fjalë ka shtatë shtylla kryesore dhe dyzet e një objektiva të cilat në mënyrë direkte mbështesin zbatimin e Planit të Përgjithshëm të Tranzicionit, duke ndërtuar dhe përmirësuar kështu sistemet e menaxhimit të mbrojtjes.
Ministri Mehaj me këtë rast theksoi se po krijohet një sistem i detajuar e i përgjegjshëm për menaxhimin e mbrojtjes që do të zbatohet në mënyrë rutinore, duke shpërndarë dhe përdorur në mënyrë efikase burime për të arritur aftësitë e dëshiruara për forcën e ardhshme.
Ministria e Mbrojtjes dhe FSK po zhvillohen me synimin e vazhdueshëm jo vetëm për garantimin e sigurisë së qytetarëve dhe mbrojtjen territoriale, por gjithashtu dhe përmbushjen e objektivit për të qenë anëtar i vyeshëm i aleancës së NATO-s, thuhet në postimin në Facebook të Ministrisë së Mbrojtjes.
