Presidentja e Kosovës, Vjosa Osmani, në kuadër të Forumit për Gratë, Paqen dhe Sigurinë, ka dekoruar gratë e Ukrainës me Medaljen Presidenciale të Meritave për guximin, sakrificën dhe kontributin e jashtëzakonshëm në mbrojtjen e vlerave të lirisë dhe demokracisë.
Presidentja Osmani ka thënë se gjatë Forumit për Gratë, Paqen dhe Sigurinë, dëgjuam rrëfime tejet prekëse nga gra ukrainase të cilat na rikujtojnë të kaluarën tonë të dhimbshme, luftën për liri dhe njëkohësisht konfirmojnë qëndresën e pashembullt të grave.
Medalja e pranuar nga deputetja e Parlamentit të Ukrainës, Yevheniia Kravchuk, si dhe gazetaret ukrainase, i dedikohet trimërisë, sakrificës dhe kontributit të grave të Ukrainës në mbrojtje të vlerave të lirisë dhe demokracisë, thuhet në faqen zyrtare të Presidentes së Kosovës.
