Anëtarë të Kryesisë, deputetë e zyrtarë të Partisë Demokratike të Kosovës kanë qenë sot për homazhe në Reçak, në 23 vjetorin e një prej masakrave që tronditi botën demokratike, ku u vranë mizorisht 45 shqiptarë të të gjitha moshave.
Partia Demokratike e Kosovës, në këtë përvjetor të dhimbjes e kujtesës tonë historike, kërkon përsëri nga organet e drejtësisë ndërkombëtare që kriminelët e vërtetë, ata të cilët janë përgjegjës për masakrat në Reçak, Mejë, Izbicë, Krushën e Madhe, Abrisë së Epërme, Kleçkë e dhjetëra të tjera, të gjinden, arrestohen dhe të vihen para drejtësisë.
Mijëra viktima shqiptare, familjet e tyre, populli ynë, vazhdon të jetojë me ndjenjën e padrejtësisë edhe sot.
Edhe më keq, 23 vite pas luftës, Kosova ende nuk e di se ku janë trupat e mbi 1600 personave të zhdukur.
Kosova kërkon dhe do të kërkojë drejtësi deri në pafundësi!
Lavdi martirëve të Reçakut. Ne nuk do të harrojmë asnjëherë!, thuhet në postimin në Facebook të PDK-së.